1 Samuel 10
1USamuyeli wasethatha umfuma wamafutha wawathela ekhanda likaSawuli wasemanga, esithi, “UJehova kakugcobanga ukuba ngumbusi welifa lakhe na? 2Ekusukeni kwakho kimi lamhla, uzahlangana lamadoda amabili eduze kwengcwaba likaRakheli, eliseZeliza esemngceleni wako-Bhenjamini. Azakuthi kuwe, ‘Obabhemi obuyebadinga sebetholakele. Khathesi uyihlo kasacabangi ngabo kodwa usekhathazeka ngawe. Uyabuza esithi, “Ngizakwenzanjani ngendodana yami na?” ’ 3“Uzahamba-ke usuka lapho uze ufike esihlahleni esikhulu saseThabhori. Amadoda amathathu aya kuNkulunkulu eBhetheli azahlangana lawe khonapho. Enye izakuba ithwele amazinyane amathathu embuzi, enye izinkwa ezintathu lenye umgodla wewayini. 4Azakubingelela akuphe izinkwa ezimbili, ozazamukela kuwo. 5“Emva kwalokho uzakuya eGibheya kaNkulunkulu lapho okulesilindo sebutho lamaFilisti khona. Lapho usubanga emzini, uzahlangana lodwendwe lwabaphrofethi besehla bevela endaweni ephakemeyo, phambi kwabo kutshaywa imiqangala lamagedla lemifece kanye lemihubhe, njalo bazakuba bephrofetha. 6UMoya kaJehova uzakwehlela phezu kwakho ngamandla, lawe uzaphrofetha labo, njalo uzaguqulwa ube ngomunye umuntu. 7Izibonakaliso lezi zingagcwaliseka, yenza loba yini okubona kufanele ukuba ukwenze, ngoba uNkulunkulu ulawe. 8“Hamba ungandulele eGiligali. Ngizakuza kuwe impela ngizenikela umhlatshelo weminikelo yokutshiswa leminikelo yobuzalwane. Kodwa kuzamele ulinde izinsuku eziyisikhombisa ngize ngifike kuwe ngikutshele okumele ukwenze.”USawuli wenziwa inkosi
9Kwathi uSawuli ephenduka esesuka kuSamuyeli, uNkulunkulu waguqula inhliziyo kaSawuli, njalo zonke izibonakaliso lezi zagcwaliseka mhlalokho. 10Bathi befika eGibheya, udwendwe lwabaphrofethi lwabahlangabeza; uMoya kaNkulunkulu wehlela phezu kwakhe ngamandla, laye wahlanganyela ekuphrofetheni kwabo. 11Kwathi labo ababevele bemazi bembona esephrofetha labaphrofethi, babuzana besithi, “Kuyini kanti lokhu osekwenzakale endodaneni kaKhishi? USawuli laye ungomunye wabaphrofethi na?” 12Umuntu owayehlala lapho waphendula wathi, “Uyise wabo ngubani na?” Ngakho kwaba yisitsho ukuthi: “USawuli laye ungomunye wabaphrofethi na?” 13Kwathi uSawuli eseyekele ukuphrofetha, wasesiya endaweni ephakemeyo. 14Ngalesosikhathi uyise omncane kaSawuli wambuza kanye lenceku yakhe wathi, “Kanti kade lingaphi?” USawuli waphendula wathi, “Kade sidinga obabhemi. Kodwa kuthe sibona ukuthi kabatholakali, sasesisiya kuSamuyeli.” 15Uyise omncane kaSawuli wasesithi, “Ngitshela ukuthi uSamuyeli utheni kuwe.” 16USawuli waphendula wathi, “Uqinise kithi ukuthi obabhemi sebebonakele.” Kodwa kamtshelanga uyise omncane okwakutshiwo nguSamuyeli ngobukhosi. 17USamuyeli wabizela abantu bako-Israyeli kuJehova eMizipha 18wathi kubo, “Nanku okutshiwo nguJehova, uNkulunkulu ka-Israyeli: ‘Ngakhupha u-Israyeli eGibhithe, njalo ngalikhulula esandleni seGibhithe lakuyo yonke imibuso eyayilicindezela.’ 19Kodwa khathesi selimalile uNkulunkulu wenu, olihlengayo ezingozini zenu zonke lasezinsizini. Njalo selithe, ‘Hatshi, sibekele inkosi ezasibusa.’ Ngakho-ke khathesi zibonakaliseni phambi kukaJehova ngezizwana zenu langezinsendo zenu.” 20Kwathi uSamuyeli esezilethe eduze zonke izizwana zako-Israyeli, isizwana sikaBhenjamini sakhethwa. 21Emva kwalokho waletha isizwana sikaBhenjamini phambili, usendo ngosendo, kwakhethwa usendo lukaMathiri. Ekucineni kwakhethwa uSawuli, indodana kaKhishi. Kodwa kwathi sebemdinga akaze abonakala. 22Ngakho babuza njalo kuJehova bathi, “Umuntu lo uzile lapha na?” UJehova wathi, “Ye, usezifihle phakathi kwezimpahla.” 23Bagijima bayamkhupha, njalo kwathi esemi phakathi kwabantu, wayemude kulabo bonke. 24USamuyeli wasesithi ebantwini bonke, “Liyambona yini umuntu osekhethwe nguJehova? Kakho lamunye onjengaye phakathi kwabantu bonke bako-Israyeli.” Abantu baklabalala besithi, “Impilo ende enkosini!” 25USamuyeli wachaza ebantwini imithetho yobukhosi. Wayiloba emqulwini wayibeka phambi kukaJehova. Emva kwalokho wabachitha abantu, ngulowo lalowo waya emzini wakhe. 26USawuli laye waya kibo eGibheya ephelekezelwa ngabantu abangamaqhawe uNkulunkulu ayethinte izinhliziyo zabo. 27Kodwa ezinye izidlwangudlwangu zathi, “Umuntu lo angasikhulula kanjani na?” Zameyisa kazaze zamlethela zipho. Kodwa uSawuli wazithulela.
Copyright information for
NdeIBE